MGENI WETU RAMADHANI

Karibu Ramadhani

Gharibu wetu kongoni, muini kwetu ingia

Sana tulikutamani, kutwa twakufikiria

Leo tuko furahani, kwa nderemo kurubia

Karibu mgeni wetu, mtukufu Ramadhani

Ramadhani tufungeni, matamanio tuwate

Kanuni tufuateni, ili fadhila tupate

Isilamu pulikani, nyiradi nyingi tuvute

Karibu mgeni wetu, mtukufu Ramadhani

Mwezi ulo na neema, mtukufu Ramadhani

Thalathini siku njema, tushindeni ibadani

Tutende matendo mema, kumridhisha Manani

Karibu mgeni wetu, mtukufu Ramadhani

Ni mwezi wa mavunoni, mwezi uso na hasara

Quruani tusomeni, na wingi wa maghufira

Na swala tuziswalini, kwa kuitendesa ghera

Karibu mgeni wetu, mtukufu Ramadhani

Kuna usiku mmoja, ni bora hauna shaka

Huja mwaka mara moja, Ramadhani ikifika

Ukiomba zako haja, huwa zatakabalika

Karibu mgeni wetu, mtukufu Ramadhani

Laila tul kadiri, ndo usiku wa baraka

Wala hauna dosari, wanashuka Malaika

Mola kauweka siri, tupate kuwajibika

Karibu mgeni wetu, mtukufu Ramadhani

Maovu mwetu moyoni, wala tusiyakubali

Yanaletwa na shetwani, saumu aibatili

Kwa jaa tuyatupeni, yanaunguza amali

Karibu mgeni wetu, mtukufu Ramadhani

Zakula tuzipikeni, nyoyo zetu kuziridhi

Tuleni kwa wasitani, afiya kuihifadhi

Isirafu tuwateni, Qudusi tusimuudhi

Karibu mgeni wetu, mtukufu Ramadhani

Zaka tusisahauni, kwa kiwango tutoeni

Wala tusibagueni, wenye haja kuwahini

Mayatima tuwapeni, pamwe nao masikini

Karibu mgeni wetu, mtukufu Ramadhani

Wetu mweni la khatima, tunamuomba Manani

Atupe afiya njema, tuifunge Ramadhani

Na kila lililo jema, lifike kwetu miini

Karibu mgeni wetu, mtukufu Ramadhani